airplanebooksbriefcase business cogs cross election entertainment fish house law lockmedicalpeopleselfservices socialtax

Mailit ilumuunngitsut

Ima takusinnaavatit: mailit ilumuunngitsut (phishing)
Naliliissalluni nalunarsinnaavoq maili ilumoornersoq imaluunniit ilumuunnginnersoq. Kisiannili misissorluaraanni takuneqarsinnaapput kukkunerit mikisinnguit, mailini ilumuunngitsuni. Mailit ilumuunngitsut aamma phishinginik taaneqartarput.

Ulluinnarni ulapaarfiusuni digitalikkut nalunaaruteqartuartartillugu oqartussaniit aammalu suliffeqarfinniit, sukkasuumik iliuuseqarnikkut toortaasarpugut, mailimik nassitsikkaangatta. Taannarpiaavorlu peqquserlunniat atornerlunniartagaat ilaarsillutik mailinik ilumuunngitsunik nassiussisarneri.

Tamatta saaffiginnissutinik pitsaasunik aammalu neqeroorutinik pitsaasunik nassitsittarpugut, qisuariarfigisarlutigillu nalinginnaasumik navianartoqarneri sissuigassaasut. Soorlu assersuutigalugu mailimi virusimut tunngasumik nutartereqqusissut. Kisiannili eqqaamajuk anersaartorluaqqaarnissat, misissorlugulu maili arlaannik peqquserluttuunersoq, toorsitinnak.

Sillimaffigisassatit arfinillit:

  1. Pisariaqarpa ilinnut tunngasut paasissutissat nassiunnissai?
  2. Oqaatsinik kukkusoqarpa allatalluunniit kukkuneqarpat?
  3. Pasinartoqarpa imaluunniit toqqaannaq linkeqarpa?
  4. Nassiussisup kissaatigaa ingerlaannartumik iliuuseqarnissat?
  5. Nassiussisup nassiussiffia mailimi eqqumiiginarpa?
  6. Maili suliffeqarfimmeersuua ilinnut attuumassuteqanngitsoq?

  1. Ilinnut tunngasut paasissutissat piumasarineqarput

    Nassiussisup piumasarippagu illit inuttut paasissutissaativit nassiunnissai, taava qularisariaqarpat. Illit paasissutissaatitit nassiutinngisaannakkit, soorlu bankimi kontovit normua, inuup normua imaluunniit isissutigisartakkat mailikkut nassiutinngisaannaruk. Piumasarineqarpat peqquserliiniartoqarneranik ilimanaateqarsimassaaq.

  2. Oqaatsit allatallu kukkunillit

    Mailit ilumuunngitsut allannerini kukkuneqarsinnaapput eqqumiitsumillu oqaaseqatigiiliortoqarsinnaalluni, pisiniarfiit ingerlalluartut suliffeqarfiilluunniit pisortaqarfiilluunniit oqartussaqarfiit suliariunnanngisai. Imaassinnaavoq allaaserisaq allamiusuumit toqqaannarlugu nutserneqarsimasoq, maskinamit nutsertitaq. Pernerlunniat kalaaliusariaqanngillat, allataq kalaallisut allaqqagaluartoq.

  3. Pasinartoq imaluunniit linkit toqqaannartut

    Linkit mailini ulorianaateqanngillat, kisianni sillimaffigisariaqarpatit linkip tuunnginnerani. Imaassiinnaammat linki allannerani kukkuneqartoq imaluunniit linki takisoorujummik eqqumiitsumillu allanneqartoq, atia nassiussisorlu assigiinngitsut. Linkit ilumuunngitsut nittartakkamut ingerlateqqissinnaavaatsit, nalinginnaasumillu virusimik ikkussillutik, imaluunniit softwaremik nakkutilliisartumik ikkussillutik, linki toorukku ingerlaannaq.

    Pisortaqarfinniit oqartussaasuniit mailit, nalinginnaasumik ingerlaannaq isissutissannik nassinnavianngilaatsit, kisiannili nittartakkap saqqaanut. Nassiussisoq apeqquseqqagukku imaluunniit linki apeqquseqqagukku, nammineerlutit nassiussisup nittartagaanut isersinnaavutit - soorlu sullissivik.gl - taamaasillutit linki nittartakkamut ilumuunngitsumut toorsinissat pisariaqassanngilaq.

  4. Erngertumik iliuuseqaqqusaavit?

    Peqquserlunniat oqaluttuaaqqamik sanasinnaasarput eqqarsarluaqqaarnani erngertumillu iliuuseqartoqarnissaa anguniarlugu, imaluunniit misissuisoqannginnissaa anguniarlugu. Soorlu imaaliortoqarsinnaavoq ilumuunngitsumik mailinnanneq atuisuuffinnik unilerneraasoq, isissutitillu nutartinngikkukkit tiimit 24-t iluanni isersinnaajunnaarsinneqarsinnaallutit.

    Peqquserluuteqarniartut piviusuusaartitsisarput, uppernassuseqarsinnaallutik ilinnut saqqummiussaqarunik. Eqqarsarluaqqaartariaqarputit aammalu mailip peqquserlunniarneersuunera misissorluarnissaanut piffissaqarluartariaqarlutit.

  5. Mailikkut nassiussisup nassiussiffia eqqumiitsoq

    Mailimik piguit nassiussisup nassiussiffiata allaqqanera misissorluaqqaartassavat. Nassiussisup atiatut allaqqanngippat imaluunniit takisoorujummik allaqqappat eqqumiiginarlunilu, taava uppernanngissusaa ilimanaateqarluinnarpoq, saaffiginnissutip ilumuunngitsuuneranik.

  6. Suliffeqarfinniit saaffiginnissutit ilinnut attuumassuteqanngitsut.

    Microsoftimiit mailinnakkuit Windowsi nutarsaqullugu, uffalu Mac-imik qarasaasiamik atugaqarlutit? Imaluuniit bankinni kontonni atuisimanermut tunngasumik nalunaarutinnakkuit, atuisuuffiginngisannik? Taava ilimanaateqarluinnarpoq mailikkut peqquserlunnianinngaanniiunissaa, nassiunneqaqattaartuusorlu sumut tamarnut, neriuuteqartunik arlaata upperalugu iliuuseqarfigissagaa.

Digitalinngortitsinermut Aqutsisoqarfik Postboks 1078 Imaneq 4 3900 Nuuk E-mail: digitalisering@nanoq.gl Oqarasuaat (+299) 34 50 00 CVR-nummer: 39350610

Nanoq_Tekst

Qarasaasianni paasissutissat ilaat atoqqissinnaajumallugit quppernermi matumani cookiet atorneqartarput. Akueriuk annertunerusumilluunniit uani paasisaqarit.