Phishingmail suuppat?
Phishingmailit tassaapput e-mailikkut allagarsiat saassussinermi atorneqartartut. IT aqqutigalugu pinerliiniat suliniaqatigiiffimmit tatiginartumeertuusaarsinnaasarput imaluunniit aningaaseriviusaarlutik oqartussaasuusaarlutilluunniit. Phishing mailit inunnut amerlasuunut ataatsikkut nassiunneqartarput, aningaasanik nuusseqqusissutinik imaluunniit link-inik toorseqqusissutinik imalinnik. Taamaaleriarlutillu fil-it suliffeqarfiup pigisaat paarnaarsortarpaat iserfigineqarsinnaajunnaarlugit, akiliuteqaqaarlunilu iserfigeqqinneqarsinnaalersillugit.
Phishing-mail ima imaqarsinnaavoq:
- Nittartakkamut ilisarisimanngisannut isissutissat nutarteqquneqarluni
- Katersuiniartunut peqataaqquneqarlutit atit allattuivimmut allaqquneqarluni
- Videumik illarnartumik takorusukkuit tuugassinneqarlutit
Phishingmailimik tigusaqarsimanerlutit qanoq paasissaviuk?
Phishing aqqutigalugu saassussinerit paasiuminaassinnaasarput, IT aqqutigalugu pinerliiniartartut suliffeqarfiit ilisarnaataasa oqariartuutaalu ilaallaqqimmatigit. Uppertikkuminaalaartuugaannili saassunneqarnermi eqqugaanissaq pinngitsoortinneqarsinnaavoq. Eqqaamasariaqarpoq oqartussat suliffeqarfiillu amerlanerpaartaasa akiliinermut paasissutissaatitit mailikkut piumanavianngimmatigit. Allagarsiaq qanorluunniit uppernarpasitsigigaluarpat paasissutissat piumaneqartut tunniutinngisaannarneqartariaqarput.
Phishingimik peqquserluttuliorniarnerit annikillisakkit
Imminut aperigit: Una mail ilumut uannukartuua?
Allagarsiat ilinnut paasissutissanik tunngasunik piumasaqaatitallit sillimaffigisakkit, ilumoorpasikkaluarpataluunniit. Pingaartumik nutsernerlutaappata kukkuneqarpallaarpatalu.
Link-it pasinapiluttut toornagit
Pinerliiniat allagarsianik salluliuutinik link-inik suliffeqarfiup systemiinut virusinik siammarterisussanik imalinnik kakkiussillutik nassiussuikkajupput.
Nassiussisoq misissoruk
Nassiussisup mailadressia ilumoornersoq qulakkertariaqarpat. Tamanna pingaarluinnarpoq suliffeqarfiup aningaasanik nuusseqquppatit. Nassiussisup atia emailialu assigiinnersut qulakkeeruk. Ilaanni assigiingajannik nassiussisoqarsinnaasarpoq assersuutigalugu xyz-zyx@virksomhed.gl aamma xyz_zyx@virksonnhed.gl. Aamma imaassinnaavoq allagarsiaqarfippit emailia pinerluffigineqarsimasoq.
Qularuit nassiussisoq sianerfigiuk
Allagarsiat ilumoortuunersoq salluliuutaanersorluunniit nalornissutigigukku, taava nassiussisoq oqarasuaatikkut sianerfigalugu qulakkeeruk allassimanersoq.