Ledningeqanngitsumik attaveqaatit angerlarsimaffittuulli toqqissisimasumiissaaq. Iluaqutaanavianngilarli matut silammut matu illup tunuatigoortoq parnaarsartuleqqikkukku, isaarissap matua ammaannartoq. Misissoruk attaveqaatit attaveqaleqqusaanngitsunut peqquserlunnianillu isumannaatsuunersoq.
Ledningeqanngitsumik attaveqaativit isumannaatsuunissaa arlalinnik peqquteqarpoq. Peqquserlunnianut ajornartitsisinnaanivit ilimanarsisissinnaavaa illit attaveqaatit puiguinnarlugu allamik ujarlilersinnaagamik.
Amerlanertigut ataasiaannarlutit misissugassaqarputit, soorlu attaveqaammut nutaamut aatsaat attaveqaruit, imaluunniit internetrouterimik nutaamik pisisimaguit. Kisiannili arlalialunnit suli misissugassaqarputit.
Isumasiuut: Routeri suua?
Internetrouteri imaluunniit routeriinnaq, boksiuvoq attavinitsitsisoq illit interneteqarninnut (soorlu Tusass) illillu enhedinnut (qarasaasiaq, oqarasuaat angallattagaq assigisaalu.).
Routerit illit internetinnut marlunnik assigiinngitsunik isissutissaqarpoq: Siulleq isissutissat attaveqaammut, illit nammineq allallu oqarasuaataanni, qarasaasiaanni allanilu attaveqaatinnut internetimullu isissagunik allatassaat. Isissutip aappaat tassaavoq routerimut isissutissaq aqutsisutut aamma indstillingikkut attaveqaammut allanngortitsisinnaasoq.
Routerimik nutaamik piguit, sanaartortut namminneq isissutissat marluk ilanngutereertarpaat. Nalinginnaasuupput isissutissat toqqarneqarsimasut, routerit meqqimik taakkulu assingalugit, taassuminnga atuisunut isissutissaq. Imaluunniit allaanerusinnaavoq, sanariingaq isissut, soorlu interneteqartitsisut sanaavi - soorlu Tusassip - taassuma toqqaassutereersinnaavaatit nipputsittakkamilu routerip ataanut nipputsissimallugu.
Suminngaanniilluunniit isissutissaq suliaagaluarpat, allaanerussuteqaraluarpalluunniit, isissutit taakku marluk illit nammineq aalajangikkannik allanngortissavatit.
Sooruna pingaaruteqartoq?
Peqquserlunniat nalunngilaat nalinginnaasut isissutit sanaartortut routeriisa isissutiliaat. Allanngortinngikkukkillu ajornanngitsuaqqamik hackertissinnaavutit.
Routerip atuinermut najoqqutaa takujuk, qanoq isillutit isissutip allanngortissinnaanera, tulleriisiinnarlugulu attaveqaatinnut aqutsilersinnaanerit takullugu.
Attaveqaatip aqqa allanngoruk, illit nammineq toqqakkannik
Taanna attaveqaat, illit routerivit pilersitaa, nalinginnaasumik ateqassaaq pilersitsisut nammineq atsigaannik imaluunniit interneteqartitsisut atsigaannik, soorlu “Tusass7568”. Ateq atorneqassaaq illit attaveqaativit ilisarnaatissaatut, nammineerlutit aalajangersinnaavat qanoq ateqassanersoq, oqarasuaativit qarasaasiavilluunniit takutissinnaavaa allattorsimasuni attaveqaatit qanittumiittut. Attaveqaatip aqqa illit allanngortissavat nammineerlutik qinikkannik, allaqqasoqassanngilaq routerip interneteqartitsisulluunniit paasissutissaanik.
Sooruna pingaaruteqartoq?
Nalinginnaasumik atillit peqquserlunnianut oqaluttuartarput, sorliit meqqit immaqalu modeli sorleq piginerit nalunngilaa. Peqquserlunniat nalunngilluinnarpaat isumannaallisaanermi putuusinnaasut modelini sorlerni iserfigisinnaanerlugit. Putut, immaqa matuneqaqqinnikut sanaartortunit, isumannaallisaanermi nutarterinermi, kisiannili peqquserlunniat nalunngilaat aamma, amerlasuut routeritik nutarterneq ajoraat. Paasineqarpallu routeri sorleq piginerit, peqquserlunnianut ajornaallisaassaatit attaveqaatinnut qanoq isersinnaanerlutik.
Routerivit atuinermut ilitsersuutaani takujuk qanoq isillutit attaveqaativit aqqa allanngortissinnaanerlugu.
Routerip indstillingiani attaveqaativit aqqutaanik paasiuminaallisaagit
Routerivit datatrafikkia paasiuminaallisillugu aaqqissinnaavat, routerinniit edhedinnut aqqutaani nassiussuisarnerani. Paasiuminaallisaaneq isumaqarpoq, datat suliarineqalertartut oqaatsitut kodenngorlugit, nassiussisup taamaallaat (soorlu routerip) tigusisullu (soorlu illit oqarasuaativit angallattakkap) taamaallaat paasisinnaasaanik.
Taamaattumik pingaaruteqarpoq paasiuminaallisaaneq datatrafikkimik routerivit indstillingiani ikissagit. Kisianni aamma pingaaruteqarpoq misissussallugu sorliit paasiuminaallisaatit typet routerip atungarinerai. Amerlasuunik toqqaasinnaaguit “WPA2” imaluunniit “WPA3” toqqassat.
Sooruna pingaaruteqartoq?
Nutaaliaq paasiuminaallisitsisartoq atortoq atorukku, dataatitit peqquserlunnianut atuaruminaatsunngussapput, attaveqaatit atukkat paasereeraluarluguluunniit. Kisiannili paasiuminaallisitsisartut atortut tamarmik pitsaasuunngillat. Ilai atortut nutaanngitsuupput soorlu “WEP”, isumannaatsuujunnaareersimassaaq. Routerivit atuinermut ilitsersuutaani takusinnaavat, qanoq isillutit paasiuminaallisitsisaat ikissinnaanerlugu.
Routerinni indstillingimi pulaartunut attaveqaatit ikumasut qamikkit
Angerlarsimaffissinni routerit ilai periarfissaqartarput ledningeqanngitsunik attaveqaatit iluani marlunnik attaveqaateqarneq: Siulleq, illit ilaquttavillu atorsinnaasarsi, isissutissaqaqqaartariaqartoq. Aappaattullu, pulaartunit atorneqarsinnaasoq, isissuteqaqqaanngikkaluarluni. Routerissi taanna periarfissaq pigippagu, pulaartunut attaveqaat qamissavat.
Sooruna pingaaruteqartoq?
Pulaartunut attaveqaat tamanut atorneqarsinnaasoq hackerinut periarfissiisuuvoq illit routerinnut attaveqalersitsinissamik. Isumaqaraluaruilluunniit firewalli ikissimallugu. Peqquserlunniat routerinnut attavinippata, isumannaallisaanissamut suliniutigisinnaasatit kingusinaarlutit iliuuseqarfigissavatit. Allatut oqaatigalugu naatsiiviup sinaa portusuumik qammarsuarliorfigineqarpoq sinaanilu tummeqqanik ilisilluni.
Qulaani allassimasut sikkerhedsindstillingimiittut tamakkereerpigit, ledningeqanngitsumillu attaveqaatit isumannaatsuugallarpa. Kisianni qaqugumorsuunngitsoq. Ataasiakkaanik suliassaqalaarpoq ingerlaavartumik suliarisariaqartunik.
Ledningeqanngitsumik attaveqaateqarnerit isumannaatsuunissaa perusukkukku, taava siunnersuutit marluk malittariaqarpatit:
- Routarit nutartertaruk tunisassiortut firmwaremik nutartersimasaat kingulleq atorlugu.
- Misissoruk nalunnginnerlugit attaveqaatinni atuisut.
Routerit nutartertaruk tunisassiortut firmwaremik nutartersimasaat kingulleq atorlugu.
Soorlu qarasaasianni oqarasuaatinnilu styresystemit assingalugit, ingerlaavartumik downloaderisassaatit installererlugulu nutartigassaq routerinnut. Routerimi softwareqanngilaq, nutarterneqartarporli firmwaremik. Tunngaviili assigiipput. Ingerlaavartumik - soorlu qaammammut ataasiarlutit - routerinnut isertassaatit misissorlugulu nutartigassaqarnersoq firmwaremi.
Ilaatigulli taamaasiornissaq eqqaamajuminaassinnaavoq. Taamaattumik routerit periarfissaqarpoq nammineerluni downloaderiillunilu installeriinissaminut isumannaallisaanermi nutarterinissanik, taannalu ikinneqarsinnaavoq instillingimi.
Sooruna pingaaruteqartoq?
Routerinni isumannaallisaanermut nutartigassat amigaateqarpata, digitalikkut peqquserlunnianut periariffaqalersinnaavoq ledningeqanngitsumik attaveqaatinnut isersinnaalernermik - aqqut tunuluaqutaasoq atorlugu. Tunisassiortut nutaamik isumannaallisaanermut nutartigassamik suliaqaraangata, peqquserlunniat paasisarpaat ingerlaannaq iserfissaqarsinnaallutik. Taamaasillutik routerinut ujarlilertarput isumannaallisaanermut tunngasumik nutarterisimanngitsunut iserfigisinnaasaminnut.
Routerivit atuinissamut najoqqutassaani takujuk qanoq isillutit isumannaallisaanermut nutartigassaq nalinginnaasumik nammineerluni nutartertarsinnaanera ikissallugu.
Misissoruk kikkut attaveqaatinniinnersut
Routerivit aqutsinermut moduliani allassimasut kikkuunersut takusinnaavatit, kikkut aktiviunersut imaluunniit attaveqaatinnik atuisimanersut. Ilai ateqarsinnaapput, illit nammineerlutit atuisuuffigisatit, soorlu “Ilaqutariit iPadsiat.” Atit allat allassimasut aamma takusinnaalissavatit. Soorlu 52-tommeri fjernsynevit atia “Samsung 6 Series 52”. Allassimasuni ilisarisaqanngikkuit, taava taakkua allassimasuniitsikkunnaassavatit attaveqaatinnut atuitissinnaajunnaarlugit.
Sooruna pingaaruteqartoq?
Enhedit ilisimaneqanngitsut digitalikkut peqquserlunniaasinnaapput, arlaatigut attaveqaatinnut iluatsitsillutik isersimasut. Peqquserlunniat atortutit atorlugit isersinnaanngorsimagunik, aqqummik anillutillu iserfigeqqissinnaasaminnik sanasinnaapput - aamma isumannaallisaammik nutarterereersimagaluaraanniluunniit.
Illit nammineerlutit enhedit peertoorsimagaluarukku ajoqutaarujussuarnavianngilaq. Taamaallaat nalunaaginnassaaq internetimut attaveerussimalluni, taava attavileqqiinnassavat.