Backup-eqannginneq (Sillimanissaq anguniarlugu assinganik toqqorterineq) suliffeqarfiit paasissutissaatiminnik pingaarutilinnik annaasaqartarnerannut tunngavii nalinginnaanersaraat. Backupinik toqqorterillaqqissuugaanni suliffeqarfiup paasissutissanik nalituunik imaluunniit pingaarutilinnik annaasaqannginnissaa qulakkeerneqarsinnaavoq. Backup-imi toqqorterinermut sungiussilluarnissamut periuutsit sisamat malikkit.
-
Suut back up-eqartinneqarnissai paasiniaruk
Suliffeqarfissinni paasissutissat suut back-up-eqartinneqarnissaminnut pisariaqarnersut paasiniarsiuk. Soorlu suliffeqarfimmi paasissutissat ilungersunartunik imallit, assersuutigalugu sullitaq pillugu paasissutissat, suliffeqarnermi isertuussaat, piginnittussatuaatitsissutit, aningaasaqarnermut paasissutissat assigisaallu.
Paasissutissat sunik imaqarnerinik paasissutissanik peqartariaqarpusittaaq, systeminilu sorlerni paasissutissat ilioqqarneqarsimaneri ilisimasariaqarnerlugit Siunnersuut 1-imi atuaruk.
-
Backup-iliukulagit akisussaasussamillu taasigit
Backup-imik toqqorterikulagit. Ajornanngippat sapaatip akunnikkaartumik imaluunniit ullut tamaasa. Pissamaatinik toqqorterisarneq qanoq akulikitsigisumik pisassanersoq nalilersorneqartariaqarpoq. Tamannalu apeqqutaassaaq paasissutissat qanoq allanngukulatigineri apeqqutaatillugit, suliffeqarfiup paasissutissat annaasinnaasatik nalilersortariaqarpaat. Assersuutigalugu ullut tamaasa assigiiaanik toqqorterinissaq pisariaqanngilaq, paasissutissat ulorianarsinnaaneri pissutigiinnarlugu.
Suliffeqarfissinni IT-mik akisussaasuusussamik toqqaagitsi, backup-inik toqqorterisartussamik.
-
Suliffeqarfiup backup-ii isumannaatsumiitikkit
Backup-ip sumut toqqorneqarnissaa eqqarsaatigilluaruk. Internetikkut attavilimmiissiinnaavoq cloud-iulluni, imaluunniit immikkut allami drev-imiilluni. Backup-issi suliffeqarfiup avataanut inissinneqarnissaa innersuunnarpoq, imermik ajutoornermi ikuallattoornermiluunniit annaaneqannginnissaa anguniarlugu.
Paasissutissaatisi paasiuminaatsunngorsarneqaqqaassanersut isumaliutersuutigisiuk. Susassaqanngitsunit tiguarneqassagaluarpata paasiuminaallisarlugit. Paasiuminaallisaaqqaarnissaq ilaatigut piumasaqaataasarpoq, paasissutissat inunnut ataasiakkaanut tunngassuteqaraangata.
Internetimut iseqqaarluni backup-inut isersinnaaneq isumaliutersuutigiuk, tamanna sillimaniarnikkut ajalusoortoqarneranit piariitsoortumik pisinnaammat.
-
Suliffeqarfiup backup-ii ajunngitsumik ingerlanersut misilittaruk
Amerlasuut kingusinaareerlutik backup iluatsissimanngitsut paasisarpaat. Taamaattumik backup ip atorsinnaassusaat akulikitsumik misiligarneqartariaqarpoq. Taama iliorsinnaavusi backup system alla atorlugu misilittarneratigut, ulluinnarni system atortagarsi avaqqullugu. Backup ikkunneqareerpat atorfissamisut innersoq misilittarneqartariaqarpoq. Suleriutsit ilaat systeminut allanut ikkunneqaraangamik allatut pissuseqarsinnaasarput, qanorlu aaqqiissutissaqarnissarsi nalilersorumaarparsi. Ikiugassaagussi IT-lerisorsi attavigisiuk.
Paasissutissat backup-imiittut atorsinnaassusaat misilittakulajuk.
IT-mik pilersuisussi backupeqarnersi aqutarippagu, pitsaassusermik piumasaqaateqarit. IT-lerisumut piumasaqaatigisinnaasatit Siunnersuut 7-imi atuakkit.