Atuartiguk

Kinaassutsimut tunngatillugu nakkutilliinertik annertusarnissaannut innersuutit, CPR-imik nalunaarsukkat siammarterneqarsimanerisa kingunerisaanik.

Inuit CPR-imi nalunaarsuiffiup paasissutissaataanik atuisinnaanngitsut unioqqutitsillutik, atuisinnaalersimanerisa kingunerisaanik pisortat, kattuffiit suliffeqarfiillu inuit ataasiakkaat kinaassusaanik nakkutilliinerulertariaqarput.

Innuttaasut kinaassusaasa CPR-normut, atit najugaqarfiillu aallaavigalugit uppernarsarneqartarneri oqartussat, kattuffiit suliffeqarfiillu sukateriffigisariaqarpaat. CPR-imit paasissutissat pinnagit paasissutissanut allamut imaluunniit oqartussat suliffeqarfiulluunniit innuttaasullu akornanni siornatigut attaveqaateqarsimanermut paasissutissanut tunngavilimmik kinaassutsimik aallaaviatigut nakkutilliisoqartariaqarpoq.  Matumani ilaatigut pineqarput inummut paasissutissat mianernartut ingerlateqqinneqartillugit imaluunniit pissutsit innuttaasumut aningaasaqarnikkut kinguneqarsinnaasut pineqartillugit.

Aalajangersimasumik uku innersuussutigineqarput

Aalajangersimasumik uku innersuussutigineqarput:

  • Innuttaasoq imminut sullissivimmut assersuutigalugu MitID atorlugu isernissaanik innersuunneqassasoq.

  • Oqarasuaatip normuanut e-mailadressemulluunniit innuttaasumut nalunaarutigineqareernikumut kodemik ataasiartakkamik nassiussisoqassasoq.

  • Nakkutilliinikkut apeqqutinik, paasissutissanut susassaqanngitsunit pissarsiarineqarsimasunut taamaallaat tunngaveqanngitsunik pisorpiamullu aallaavilinnik aperisoqassasoq. Suliffeqarfinnut tunngatillugu assersuutigalugu tassaasinnaavoq atuisutut normu, isumaqatigiissutip normua, akiligassalluunniit kingulliup normua pillugu paasissutissat. Pisortani oqartussanut assersuutigalugu tassaasinnaavoq siornatigut najugaq imaluunniit kingullertut attaveqarfigisaq sulialluunniit ingerlanera pillugu paasissutissat.

  • Innuttaasumut oqarasuaatip normuanut, innuttaasumut tunngatillugu nalunaarsorneqareersimasumut sianertoqassasoq, saaffiginnissummi pineqartumi normu ilisimatitsissutigineqartoq atornagu.

  • Innuttaasoq uppernarsaammik nassarluni takkunnissaanik qinnuigineqassasoq, matumani saaffiginnissut aningaasaqarnerup isumannaallisaanikkulluunniit immikkut ittumik allanngortoqarsimaneranik tunngappat.

  • Nammineq nakkutilliisarnermik imaluunniit aningaasaqarnermut isumannaallisaanikkulluunniit pingaarutilimmik allanngortoqarnerani piffissamik utaqqiffiusussamik eqqussisoqassasoq.